Prokuroria Themelore në Mitrovicë të mërkurën ka njoftuar arrestimin e dy mjekëve të Spitalit të Vushtrrisë, me iniciale E.S. dhe V.R., nën dyshimin për kryerjen e veprës penale marrje ryshfeti.
Sipas dyshimeve fillestare, E.S. ka kërkuar dhe pranuar para në tre raste, ndërsa V.R. në pesë raste, nga qytetarët ose pacientët në këmbim të ofrimit të shërbimeve shëndetësore.
Media raportojnë se bëhet fjalë për Ekrem Sefiu dhe Valdet Rexhepi.
Me vendim të prokurorit, të dyshuarve u është caktuar masa e ndalimit prej 48 orësh. Brenda afatit ligjor, Prokuroria do të paraqesë kërkesën për caktimin e masës së sigurisë ndaj tyre.
Prokuroria Themelore në Mitrovicë thekson se mbetet e përkushtuar në luftimin e korrupsionit, keqpërdorimit të detyrës zyrtare dhe çdo forme të kriminalitetit që cenon sundimin e ligjit, sigurinë publike dhe besimin e qytetarëve në institucionet publike.
Përditësime
Prokuroria pasdite dërgoi kërkesën për paraburgim ndaj dy mjekëve të Spitalit të Vushtrrisë. Të dyshuarit dyshohen për marrje rysfeti në shuma nga 50 deri në 300 euro dhe kanë aktakuza të mëparshme për të njëjtën vepër. Seanca gjyqësore pritet nesër.