Seanca fillestare ndaj kirurgëve Ekrem Sefiu dhe Valdet Rexhepi, të dyshuar për marrje ryshfeti, po mbahet në Gjykatën Themelore në Mitrovicë, në Departamentin e Krimeve të Rënda. Të dy punonin në Spitalin e Përgjithshëm në Vushtrri. Sipas mediave që raportuan seancën, të 11 të pandehurit u deklaruan të pafajshëm.
Prokuroria Themelore në Mitrovicë ka ngritur aktakuzë ndaj dy kirurgëve dhe nëntë personave të tjerë, të dyshuar se u kanë dhënë ryshfet mjekëve për operimin e familjarëve të tyre.
Sipas aktakuzës së paraqitur nga prokurorja Fetije Bajrami, Rexhepi dyshohet se ka kërkuar dhe pranuar para në gjashtë raste, ndërsa Sefiu në tri raste. Prokuroria thotë se paratë janë kërkuar dhe pranuar në këmbim të ofrimit të shërbimeve të trajtimit mjekësor për pacientët.
Në një rast, Rexhepi dyshohet se mori 100 euro, në dy këste nga 50 euro, nga Florim Veliu për operimin e pacientes F.V. Sipas aktakuzës, më 5 mars 2026, ai dyshohet se mori edhe 100 euro, në dy këste nga 50 euro, nga Berat Qafëleshi, përfaqësues i kompanisë farmaceutike “FexPharma”.
Nëntë të pandehurit e tjerë akuzohen se, drejtpërdrejt ose tërthorazi, për vete ose për persona të tjerë, u kanë ofruar mjekëve shuma nga 50 deri në 300 euro, si shpërblim për operimin e familjarëve të tyre. Spitali i Vushtrrisë i ka pezulluar të dy mjekët nga detyra deri në përfundimin e procesit gjyqësor.
Përditësime
Të 11 të pandehurit u deklaruan të pafajshëm, ndërsa aktakuza përshkruan dy raste të tjera të dyshuara të marrjes së parave nga Valdet Rexhepi.