Prokuroria Themelore në Pejë ka njoftuar ngritjen e aktakuzës ndaj dy shtetasve, të identifikuar me inicialet V.H. dhe A.K., nën dyshimin për kryerjen e veprës penale “Mashtrimi”. Sipas dokumentit të akuzës, ngjarja ka ndodhur në fshatin Lubeniq të Pejës, ku të dyshuarit kanë përfituar në mënyrë të kundërligjshme shumën prej 134 mijë e 761 eurosh.
I pandehuri V.H. dyshohet se është paraqitur rrejshëm si mjek në specializim në një spital në Turqi, duke i premtuar viktimës mundësinë e transplantimit të veshkës. Për të mbështetur këtë mashtrim, ai akuzohet se ka përdorur dokumente, të dhëna dhe emra të rremë të personelit mjekësor turk, me qëllim që të krijonte besim te i dëmtuari. Ndërkohë, i pandehuri A.K. dyshohet se ka ndihmuar në këtë vepër penale duke e ndërmjetësuar takimin mes palëve dhe duke përforcuar paraqitjen e rreme të V.H.-së si mjek.
Në njoftimin e prokurorisë thuhet gjithashtu se është veçuar procedura penale për një person të tretë, i cili dyshohet se është paraqitur si dhurues i veshkës në këtë skemë. Prokurori i çështjes i ka propozuar Gjykatës Themelore në Pejë që të pandehurit të shpallen fajtorë dhe të dënohen sipas dispozitave ligjore në fuqi.
Të gjithë të përfshirët në këtë çështje gëzojnë prezumimin e pafajësisë deri në marrjen e një vendimi përfundimtar nga gjykata. Sipas mediave Bota Sot dhe Albeu, njëri nga të dyshuarit, V.H., identifikohet si Valmir Hajrullahu dhe është person me precedentë të mëparshëm.
Përditësime
Prokuroria Themelore në Pejë ka saktësuar periudhën kohore të kryerjes së veprave penale nga ana e të pandehurve V.H. dhe A.K. Sipas hetimeve të përditësuara, aktiviteti i kundërligjshëm ka ndodhur në intervalin kohor nga 26 maji 2021 deri më 29 shtator 2023.