Një ngjarje e rëndë ka ndodhur gjatë orëve të mëngjesit në qytetin e Pejës, ku dy persona kanë mbetur të plagosur pas një sulmi me mjet të mprehtë. Rasti është raportuar në organet e rendit rreth orës 08:45, në rrugën “Mbretëresha Teutë”.
Menjëherë pas njoftimit, njësitë e Policisë së Kosovës kanë mbërritur në vendin e ngjarjes për të kryer veprimet hetimore. Zëdhënësi i policisë për rajonin e Pejës, Driton Rugova, konfirmoi se të dëmtuarit janë dërguar për trajtim mjekësor në Spitalin Rajonal të Pejës. Sipas informacioneve mjekësore, gjendja shëndetësore e të plagosurve paraqitet stabile.
Sipas të dhënave të deritanishme, personat e dyshuar janë larguar nga vendi i ngjarjes përpara mbërritjes së forcave të rendit dhe ndodhen në arrati. Policia e Kosovës është duke zhvilluar hetime intensive për identifikimin e autorëve dhe zbardhjen e rrethanave të këtij sulmi. Burimet zyrtare të policisë konfirmojnë se hetimet për kapjen e të dyshuarve janë në vazhdim e sipër.