Ky artikull është përditësuar. Shiko përditësimet
Një person ka mbetur i plagosur sot në rrugën Adem Jashari në Pejë, si pasojë e një incidenti me armë zjarri. Ngjarja ka ndodhur rreth orës 09:55, kur policia është njoftuar për rastin.
Zëdhënësi i Policisë për Rajonin e Pejës, Driton Rugova, ka konfirmuar ngjarjen. Ai ka bërë të ditur se policia ka reaguar menjëherë në vendin e ngjarjes. I plagosuri fillimisht është dërguar në Emergjencën e Spitalit të Pejës, por për shkak të natyrës së lëndimeve është transferuar në Qendrën Klinike Universitare të Prishtinës për trajtim të mëtejshëm.
Personat e dyshuar janë larguar nga vendi i ngjarjes në drejtim të panjohur. Policia ka nisur hetimet për zbardhjen e rrethanave të rastit dhe po shqyrton të gjitha pistat e mundshme. Për momentin, nuk janë dhënë detaje mbi motivin e sulmit.
Përditësim
Jeton Buquku, afarist i njohur nga Peja, u identifikua si viktima e plagosur me armë zjarri. Prokuroria Themelore në Pejë vizitoi vendin e ngjarjes, ku ishte i pranishëm prokurori i specializuar për Krime të Rënda. Hetimet po zhvillohen intensivisht për identifikimin dhe kapjen e të dyshuarve, me disa persona të identifikuar si pista kryesore.
Përditësim
Jeton Buquku ka gjendje të qëndrueshme shëndetësore dhe pritet të operohet në Klinikën Ortopedike pas disa ditësh. Ai ndodhet në Reanimacionin e QKUK-së për ekzaminime shtesë dhe konsultime mjekësore, konfirmuan mjekja Dafina Basholli dhe doktoreshja Vlora Podvorica.
Dyshohet se tre persona kanë gjuajtur me armë zjarri drejt tij.
Zëdhënësi i Prokurorisë, Shkëndor Nikçi, deklaroi se krimteknika po kryen hetime intensive për identifikimin e të dyshuarve.
Shkodran Nikçi, zëdhënës i Prokurorisë, deklaroi se prokurori i Krimeve të Rënda ndodhet në vendngjarje në Pejë, bashkë me policinë dhe njësi të tjera relevante. Ai theksoi veprimet intensive hetimore për identifikimin e të dyshuarve.
Policia e Kosovës konfirmoi se ngjarja ndodhi brenda një lokali privat në Pejë, jo në rrugën Adem Jashari, rreth orës 09:15. Viktima u plagos me armë zjarri dhe më pas u sulmua fizikisht. Sipas raportit ditor të Policisë së Kosovës: "Ngjarja raportohet të ketë ndodhur në një ambient privat, ku një person u plagos me armë zjarri dhe u sulmua fizikisht pas incidentit."
Policia ka konfirmuar në raportin 24-orësh se ngjarja klasifikohet zyrtarisht si Vrasje në Tentativë. Viktima u godit me një mjet të fortë, duke e dalluar nga një sulm fizik i thjeshtë, sipas autoriteteve.