Policia e Korçës ka proceduar penalisht dy punonjëse të Postës Shqiptare në Zyrën Postare Bilisht, Devoll, për dyshimin e vjedhjes së rreth 22 milionë lekëve të rinj nga fondet e postës.
Bëhet fjalë për Paola Shaholli, 29 vjeçe, përgjegjëse e zyrës postare Vishocicë në Devoll, dhe Eda Çeliku, 27 vjeçe, arkëtare-llogaritare në degën postare Devoll. Të dyja banuese në Bilisht, ato dyshohen se, në bashkëpunim me njëra-tjetrën, gjatë periudhës shtator 2025 deri në janar 2026, kanë përvetësuar fondet, kryesisht ato të pensioneve dhe ndihmave ekonomike për pensionistët jashtë vendit.
Sipas hetimit, Paola Shaholli dyshohet se ka falsifikuar nënshkrimet e përfituesve dhe ka shpërdoruar fondet, ndërsa Eda Çeliku ka manipuluar dhe falsifikuar mandatpagesat në librat e arkës dhe sistemin e menaxhimit të parave cash për të fshehur vjedhjen.
Reagimi i Postës Shqiptare
Posta Shqiptare, përmes Filialit Korçë, bën të ditur se, pas konstatimit të parregullsive në administrimin e fondeve në Zyrën Postare Bilisht, ka kryer kontrole të brendshme. Këto kanë evidentuar mungesë fondesh dhe parregullsi në dokumentacionin financiar.
Institucioni ka depozituar kallëzim penal pranë organeve të drejtësisë dhe ka ndërmarrë veprime administrative e ligjore sipas legjislacionit në fuqi. Posta Shqiptare siguron qytetarët se fondet e pensioneve nuk janë cënuar dhe shpërndarja e tyre vazhdon normalisht, pa ndërprerje, duke garantuar vazhdimësinë e shërbimit për të gjithë përfituesit.
Ajo thekson se do të bashkëpunojë plotësisht me organet e hetimit, duke vënë në dispozicion dokumentet e nevojshme. Institucioni distancohet nga çdo abuzim me detyrën dhe angazhohet për transparencë, ligjshmëri dhe mbrojtjen e interesit publik, duke trajtuar çdo shkelje me seriozitet maksimal.