Dy shtetas turq u arrestuan në Fushë-Kosovë nën dyshimin se njërit iu gjet marihuanë, ndërsa tjetrit një revole me gjashtë fishekë. Sipas raportit 24-orësh të Policisë së Kosovës, rasti u regjistrua më 13 tetor 2026, në orën 23:58, në rrugën Presheva.
Policia shkoi në lokacion pas marrjes së një informate dhe gjeti një qese me 62,55 gramë marihuanë. Gjatë kontrollit të banesës u gjet edhe një revole me karikator dhe gjashtë fishekë, në dhomën e të dyshuarit tjetër, gjithashtu shtetas turk. Policia sekuestroi lëndën e dyshuar narkotike dhe armën.
Me vendim të prokurorit kujdestar u hapën dy raste të ndara: njëri për “Posedim të paautorizuar të narkotikëve, substancave psikotrope dhe analoge”, dhe tjetri për “Mbajtje në pronësi, kontroll ose posedim të paautorizuar të armëve”. Pas intervistimit, të dy të dyshuarit u dërguan në mbajtje.
Të dyshuarit konsiderohen të pafajshëm, përveç nëse fajësia e tyre vërtetohet nga gjykata me vendim të formës së prerë.