Dy shtetas turq, 36 dhe 22 vjeç, u arrestuan në Shkup më 18 tetor, nën dyshimin për tentim-vrasje ndaj dy personave 26-vjeçarë, gjithashtu shtetas turq. Sipas njoftimit të policisë, sulmi ndodhi në një banesë në lagjen Karposh, ku dy të dyshuarit dhe një person i tretë dyshohet se sulmuan fizikisht dy viktimat dhe i plagosën me një mjet të mprehtë.
Në banesë ndodheshin edhe dy gra. Pas incidentit, të dyshuarit u larguan nga vendi i ngjarjes. Policia i lokalizoi dhe i ndaloi dy prej tyre në rrugën Jadranska Magistrala në Shkup.
Ndaj të arrestuarve, të identifikuar si K.M., 36 vjeç, dhe S.B.P., 22 vjeç, është ngritur kallëzim penal me procedurë të shpejtë. Ata dyshohen se e kanë kryer veprën në bashkëpunim me personin e tretë, për të cilin policia po vijon veprimet për identifikimin dhe arrestimin. Alsat-M raporton se edhe personi i tretë dyshohet se është shtetas turk.