Në rajonin malor të Tirolit të Jugut në Itali, dy skiatorë kanë humbur jetën si pasojë e një orteku, ndërsa një person tjetër ka pësuar lëndime të rënda.
I lënduari u transportua me helikopter nga shërbimi austriak i shpëtimit drejt Klinikës Universitare në Innsbruck, ku po trajtohet.
Operacioni i kërkim-shpëtimit mobilizoi gjashtë helikopterë dhe rreth 80 ekipe nga e gjithë lugina Alta Valle Izarco. Ekipet u angazhuan për lokalizimin dhe shpëtimin e personave të prekur.
Autoritetet kanë theksuar kushtet e motit dhe rrezikun e lartë nga ortekët si faktorë kryesorë. Ata kanë paralajmëruar skiatorët dhe turistët për kujdes në zonat alpine.
Ngjarja vjen në një moment simbolik, pasi më 12 mars u shënua dhjetëvjetori i ortekut në Monte Nevos, ku humbën jetën gjashtë persona.