Në shqyrtimin fillestar të mbajtur më 16 tetor, Denis Ceman dhe Gazmend Hyseni pranuan fajësinë për akuzat që lidhen me korrupsionin dhe vepra të tjera penale në Telekomin e Kosovës. Trim Musliu, Kreshnik Musliu, Armend Osaj dhe Fatbardh Abazaj u deklaruan të pafajshëm. Seancën e drejtoi gjykatësja Violeta Namani-Hajra.
Mbrojtëset Merita Bajraktari dhe Arbenita Aliu kërkuan miratimin e pranimit të fajësisë, duke thënë se klientët e tyre ishin konsultuar dhe i kuptonin përfitimet dhe pasojat. Prokurori special Rafet Halimi e mbështeti kërkesën dhe propozoi që dënimi të shpallej pasi të përfundonte procedura për të akuzuarit e tjerë, pasi Ceman dhe Hyseni janë dëshmitarë bashkëpunues.
Gjykatësja e miratoi pranimin e fajësisë, pasi vlerësoi se të akuzuarit ishin konsultuar mjaftueshëm me mbrojtësit. Shpallja e vendimit për ta u shty deri në përfundimin e procedurës ndaj të akuzuarve të tjerë. Katër të akuzuarve që u deklaruan të pafajshëm iu dha afat prej 30 ditësh për të paraqitur kundërshtimet ndaj provave dhe kërkesën për hedhjen e aktakuzës.
Ceman dhe Hyseni e kishin pranuar fajësinë edhe në shqyrtimin fillestar të 5 nëntorit 2024. Pas ndryshimit të kryetarit të trupit gjykues, shqyrtimi fillestar nisi nga e para.
Pretendimet në aktakuzë
Aktakuza u ngrit më 26 qershor 2024 nga Prokuroria Speciale e Republikës së Kosovës (PSRK). Në të përmenden gjithashtu Alban Limani dhe Fatbardh Ajvazi. Sipas aktakuzës, Trim Musliu, në cilësinë e drejtorit të marketingut në Telekomin e Kosovës, nga 21 janari deri më 24 prill 2019 lidhi kontratë me kompaninë “Zone Mobile” për furnizim me 239 telefona. Prokuroria pretendon se ai përvetësoi 153 prej tyre. Në një furnizim të dytë me 16 telefona, dyshohet se përvetësoi edhe 11, me vlerë të përgjithshme prej 164.847 eurosh e 83 centësh. Musliu akuzohet për përvetësim në detyrë.
Sipas aktakuzës, Armend Osaj, atëherë drejtor i Financave dhe Thesarit, lidhi kontratë me “Zone Mobile” për telefona, USB dhe modemë, me vlerë 207.733 euro e 10 centë. Nga 305 telefonat e pranuar, ai dyshohet se përvetësoi 48, me vlerë 32.692 euro e 32 centë. Edhe Osaj akuzohet për përvetësim në detyrë.
Një tjetër pikë e aktakuzës ngarkon Trim Musliun, Kreshnik Musliun dhe Cemanin për falsifikim dokumentesh në periudhën 1 nëntor–31 dhjetor 2020. Sipas Prokurorisë, Trim Musliu i kërkoi vëllait të tij, Kreshnikut, të përpilonte dokumente të falsifikuara. Kreshniku dhe Ceman shkuan në Pejë dhe Istog, u paraqitën te biznese të ndryshme me logon e “Valës” dhe i ftuan të aplikonin për telefona. Sipas aktakuzës, ofertat u vulosën me vulat e bizneseve dhe iu dorëzuan Trim Musliut.