Prokuroria Speciale e Republikës së Kosovës njoftoi ngritjen e aktakuzave për ish-zyrtarë të Ministrisë së Mjedisit. Ndaj të pandehurit Naser Hafizi janë ngritur akuza për tri vepra penale: "Keqpërdorimi i pozitës apo autoritetit zyrtar", "Shpëlarja e parave" dhe "Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare".
Sipas Prokurorisë, gjatë viteve 2021-2023, Hafizi, në cilësinë e personit zyrtar, ka tejkaluar kompetencat ligjore me qëllim favorizimin e operatorëve ekonomikë ambalazhues të ujit. Akuzat pretendojnë se ai nuk i ka dërguar të gjithë operatorët në vlerësim te Grupi Punues Ministror dhe, pas pranimit të raportit, ka selektuar operatorët në tri grupe për të mundësuar përcaktimin e detyrimeve financiare mbi bazën e raportimeve të paverifikuara. Gjithashtu, ai akuzohet se nuk i ka zbatuar vlerësimet e Grupit Punues, duke sjellë kështu një dëm financiar për buxhetin e shtetit në vlerën e saktë prej 15.752.486,07 euro.
Në të njëjtin njoftim, Prokuroria Speciale ka bërë të ditur ngritjen e aktakuzës edhe ndaj Izedin Bytyqit, ish-zëvendëssekretar i Ministrisë së Mjedisit, për veprën penale "Mbajtja në pronësi, kontroll ose posedim të paautorizuar të armëve".
Organi i akuzës thekson se aktakuzat përfaqësojnë pretendimet e Prokurorisë Speciale, ndërsa përgjegjësia penale e të pandehurve dhe fajësia e tyre do të përcaktohen përmes një vendimi gjyqësor të formës së prerë. Deri në atë moment, të pandehurit konsiderohen të pafajshëm.