Në seancën fillestare të enjten në Gjykatën Themelore në Prishtinë, Naser Hafizi u deklarua i pafajshëm për tri vepra penale: keqpërdorim të pozitës ose autoritetit zyrtar, shpëlarje parash dhe mosraportim ose raportim të rremë të pasurisë, të ardhurave, dhuratave, dobisë tjetër materiale ose detyrimeve financiare. “Deklarohem plotësisht i pafajshëm”, tha Hafizi.
Prokuroria Speciale e Republikës së Kosovës e akuzon Hafizin se, në cilësinë e ushtruesit të detyrës së drejtorit të Autoritetit Rajonal të Pellgjeve Lumore (ARPL) në Ministrinë e Mjedisit, Planifikimit Hapësinor dhe Infrastrukturës, keqpërdori detyrën për t’u mundësuar ambalazhuesve të ujit përfitime pasurore të kundërligjshme.
Sipas aktakuzës, gjatë viteve 2021–2023, Hafizi tejkaloi kompetencat ligjore dhe nuk përmbushi detyrat zyrtare, duke i shkaktuar buxhetit të shtetit dëm në shumën e përgjithshme prej 15.752.486,07 eurosh. Prokuroria pretendon se ai nuk i dërgoi të gjithë operatorët ekonomikë për vlerësim te Grupi Punues Ministror. Pas marrjes së raportit të grupit, sipas akuzës, Hafizi i ndau operatorët në tri grupe, duke u mundësuar që detyrimet financiare të përcaktoheshin mbi bazën e raportimeve të tyre të paverifikuara. Prokuroria thotë gjithashtu se ai nuk zbatoi vlerësimet e grupit gjatë caktimit të borxheve dhe uli detyrimet financiare për shfrytëzimin e ujit.
Pas deklarimit të Hafizit, gjyqtari Kujtim Krasniqi njoftoi atë dhe avokatin e tij, Ahmet Tahiri, se kanë 30 ditë për të kundërshtuar provat dhe për të paraqitur kërkesë për hedhjen poshtë të aktakuzës.
Hafizi u arrestua në aeroportin e Prishtinës më 10 tetor 2024. Dy ditë më herët, gjatë një aksioni, Prokuroria Speciale kishte njoftuar se nuk e kishte gjetur në vendbanimin e tij. Sipas Prokurorisë, borxhi i operatorëve ekonomikë ndaj ARPL-së ishte afër 20 milionë eurove, ndërsa Hafizi dyshohej se kishte nisur në mënyrë të kundërligjshme nxjerrjen e vendimeve për zvogëlimin e borxheve.
Në të njëjtin rast, më 9 tetor 2024, Gjykata Themelore në Prishtinë caktoi masën e arrestit shtëpiak për 30 ditë ndaj Izedin Bytyqit, zëvendëssekretar në Ministrinë e Mjedisit, Planifikimit Hapësinor dhe Infrastrukturës. Ai dyshohej për keqpërdorim të detyrës zyrtare dhe armëmbajtje pa leje.