Prokuroria Speciale e Republikës së Kosovës ka ngritur aktakuzë ndaj A.Z. dhe F.Rr., dy zyrtarë të Pallatit të Rinisë Sh.A. në Prishtinë, më 30 mars 2026.
Sipas aktakuzës, A.Z., në cilësinë e menaxherit të financave dhe më pas ushtrues detyre i kryeshefit ekzekutiv, dyshohet se gjatë viteve 2021-2022 ka keqpërdorur mbi 137 mijë euro të ndërmarrjes, duke realizuar transfere të paautorizuara në llogari personale dhe të personave të tjerë.
Me këto veprime, A.Z. ngarkohet me veprat penale "Përvetësimi në detyrë" dhe "Keqpërdorimi i pozitës apo autoritetit zyrtar".
Ndërsa F.Rr., në cilësinë e zyrtarit përgjegjës për sigurim, dyshohet se ka ndihmuar A.Z., duke tërhequr 9.250 euro në para të gatshme dhe duke ia dorëzuar ato, duke mundësuar përfitim të kundërligjshëm.
F.Rr. ngarkohet me veprën penale "Ndihma në kryerjen e veprës penale – Keqpërdorimi i pozitës apo autoritetit zyrtar".
Prokuroria Speciale thekson përkushtimin për luftën kundër korrupsionit dhe keqpërdorimeve në sektorin publik.