Prokuroria Themelore në Prizren ka ngritur aktakuzë kundër B.J., në cilësinë e personit zyrtar dhe mbikëqyrës të projektit "Ndërtimi i infrastrukturës në fshatin Vlashnje, rrugët dhe ndriçimi publik", si dhe kundër J.B., përfaqësues i autorizuar i operatorëve ekonomikë “M.B.G.” Sh.P.K dhe “A.P.” Sh.P.K.
Sipas aktakuzës, B.J. dyshohet se, gjatë periudhës nga gushti 2022 deri më 16 gusht 2024, duke shfrytëzuar detyrën dhe autoritetin zyrtar, tejkaloi kompetencat dhe veproi në kundërshtim me Ligjin për Prokurimin Publik. Ai përpiloi raporte dhe situacione fiktive, ku paraqiti se punimet ishin kryer sipas kontratës, ndonëse në terren gjendja ishte ndryshe.
Këto veprime futën në lajthim Komisionin për Pranimin Teknik, i cili përpiloi raport pranimi të gabuar, duke konfirmuar realizimin e punimeve sipas specifikimeve kontraktuale. Si pasojë, u kryen pagesa në favor të kompanive “M.B.G.” Sh.P.K dhe “A.P.” Sh.P.K, pavarësisht se punimet nuk ishin përfunduar sipas kushteve të kontratës.
Përmes këtyre veprimeve, Komunës së Prizrenit i është shkaktuar dëm material në vlerë 18,765 euro, ndërsa e njëjta shumë konsiderohet përfitim pasuror i kundërligjshëm për operatorët ekonomikë. B.J. akuzohet për veprën penale "Keqpërdorimi i pozitës apo autoritetit zyrtar" sipas nenit 414 të Kodit Penal të Republikës së Kosovës.
Ndërkaq, J.B. dyshohet se, në bashkëpunim me B.J., shkeli procedurat e prokurimit publik dhe nuk zbatoi detyrimet kontraktuale me qëllim përfitimi pasuror. Ai akuzohet për veprën penale "Keqpërdorimi dhe mashtrimi në prokurim publik" sipas nenit 415 të Kodit Penal.