Prokuroria Themelore në Prizren, përmes Departamentit të Krimeve të Rënda, ka ngritur aktakuzë kundër të pandehurve Beqir Berisha dhe A.M., duke i ngarkuar ata me vepra penale që lidhen me keqpërdorimin e detyrës zyrtare dhe mashtrimin në prokurim publik.
Sipas aktakuzës, në periudhën midis 23 shtatorit 2019 dhe 20 dhjetorit 2021, Beqir Berisha, në cilësinë e menaxherit të kontratës për projektin “Ndërtimi i lapidarit për viktimat e viteve (1912-1945)” në fshatin Samadraxhë, akuzohet se ka tejkaluar kompetencat e tij zyrtare. Ai dyshohet se ka nënshkruar pagesën prej 5,000 eurosh për situacionin e katërt të kontratës, duke vërtetuar rrejshëm se punimet ishin realizuar në përputhje me paramasën dhe parallogarinë, pavarësisht se në terren ato nuk përputheshin me specifikimet teknike dhe nuk ishte bërë asnjë kërkesë për kolaudim.
I akuzuari A.M., si person përgjegjës i operatorit ekonomik A.G. Sh.P.K., akuzohet se nuk i ka zbatuar detyrimet kontraktuale dhe ka pranuar shumën prej 5,000 eurosh, duke përfituar mjete publike në mënyrë të kundërligjshme. Ekspertiza e ndërtimtarisë e bashkangjitur në dosjen e prokurorisë konfirmon se ky veprim ka shkaktuar dëm material ndaj Komunës së Suharekës.
Prokurori i çështjes i ka propozuar gjykatës që pas administrimit të provave në shqyrtimin gjyqësor, të pandehurit të shpallen fajtorë dhe të dënohen sipas ligjit.
Ky rast shënon një zhvillim të mëtejshëm për Beqir Berishën, i cili është përballur edhe më parë me një aktakuzë nga Prokuroria në Prizren në vitin 2024. Në atë proces, ai dyshohet së bashku me zyrtarin B.K. për keqpërdorim të detyrës në projektin e objekteve sportive dhe kulturore, duke shkaktuar një dëm të vlerësuar prej rreth 7,000 eurosh ndaj buxhetit komunal. Të gjithë personat e përmendur konsiderohen të pafajshëm derisa fajësia e tyre të vërtetohet me vendim të formës së prerë nga gjykata.
Përditësime
Prokuroria ka ngritur aktakuzë ndaj Beqir Berishës, ish-drejtor i Kulturës, Rinisë dhe Sportit në Komunën e Suharekës. Sipas hetimeve, kontrata për projektin e lapidarit kap vlerën prej 28,650 euro. Berisha akuzohet për veprat penale të keqpërdorimit të pozitës apo autoritetit zyrtar dhe mashtrimit në detyrë, të sanksionuara nga nenet 414 dhe 415 të Kodit Penal të Republikës së Kosovës (KPRK).