Departamenti i Krimeve të Rënda pranë Prokurorisë Themelore në Prizren ka ngritur aktakuzë ndaj shtetasit U.D. dhe kompanisë M.L.L.C. për veprën penale "Keqpërdorimi dhe mashtrimi në prokurim publik", parashikuar nga neni 415 i Kodit Penal të Republikës së Kosovës.
Sipas aktakuzës, ngjarja ka ndodhur gjatë muajit gusht të vitit 2024. I pandehuri, në cilësinë e drejtorit të kompanisë, ka paraqitur dokumentacion të rremë gjatë procedurës së prokurimit për projektin "Sigurimi fizik në objektet e shëndetësisë primare të Komunës së Prizrenit", me vlerë 80,825.60 euro. Prokuroria pretendon se paraqitja e faturës së pasaktë është bërë me qëllim të mashtrimit dhe ndikimit në vendimmarrjen e autoritetit kontraktues.
Hetimet kanë konfirmuar përmes Administratës Tatimore të Kosovës (ATK) se fatura e paraqitur në vlerë prej 4,775.00 euro nuk ishte e deklaruar konform legjislacionit tatimor në fuqi.
Prokurori i çështjes i ka propozuar gjykatës që, pas shqyrtimit gjyqësor dhe administrimit të provave, të pandehurit të shpallen fajtorë dhe të dënohen sipas ligjit. Për të pandehurin U.D., është propozuar gjithashtu dënimi plotësues: ndalimi i ushtrimit të funksioneve në administratën publike ose në shërbimin publik.