Prokuroria Themelore në Prishtinë, Departamenti për Krime të Rënda, ka ngritur aktakuzë ndaj J.P. dhe një personi juridik, nën dyshimin për veprën penale “Keqpërdorimi dhe mashtrimi në prokurim publik”. Rasti lidhet me tenderin e Ministrisë së Shëndetësisë për furnizim me material shpenzues medicinal nga Lista Esenciale, ku dyshohet se është paraqitur dokumentacion i rremë.
Sipas aktakuzës, më 19 janar 2024, J.P., në cilësinë e drejtorit dhe personit përgjegjës të kompanisë “M… P…” SH.P.K., ka paraqitur ofertë në emër dhe në interes të shoqërisë. Grupi i operatorëve ekonomikë kishte paraqitur ofertë për Lotin 1, në vlerë prej 344.955,77 eurosh, dhe për Lotin 3, në vlerë prej 169.012,36 eurosh. Vlera e përgjithshme e ofertave ishte 513.968,13 euro.
Në dokumentacionin e ofertës ishte përfshirë certifikata ISO 13485:20216, me numër 47014, e lëshuar nga autoriteti certifikues “NQA” për prodhuesin “Forlong Medical Co., Ltd” nga Kina. Certifikata ishte paraqitur si dëshmi për përmbushjen e kërkesës nr. 2 të dosjes së tenderit, që lidhet me kapacitetet teknike dhe profesionale.
Sipas aktakuzës, certifikata kishte skaduar dhe ishte anuluar në tetor të vitit 2022. Prokuroria dyshon se në dokumentin e paraqitur data e vlefshmërisë ishte ndryshuar nga 18 tetor 2022 në 18 tetor 2024.
Prokuroria pretendon se, përmes paraqitjes së dokumentit, J.P. ka shkelur me dashje rregullat e prokurimit publik për dokumentacionin që dëshmon përmbushjen e kritereve të tenderit. Sipas aktakuzës, qëllimi i dyshuar ishte të vihej në lajthitje autoriteti kontraktues për përmbushjen e kërkesave dhe të ndikohej vlerësimi i ofertës dhe vendimmarrja për dhënien e kontratës, në interes të personit juridik. Të pandehurit akuzohen për veprën e paraparë në nenin 415, paragrafi 1, të Kodit Penal të Republikës së Kosovës.
Me ngritjen e aktakuzës, prokurori i çështjes i ka propozuar gjykatës kompetente që, pas shqyrtimit gjyqësor dhe administrimit të provave, të pandehurit të shpallen fajtorë dhe të dënohen sipas ligjit. Ai ka kërkuar gjithashtu ndalimin e pjesëmarrjes së tyre në procedurat për dhënien e kontratave të prokurimit publik. Të pandehurit konsiderohen të pafajshëm derisa fajësia të vërtetohet me vendim të formës së prerë.