Prokuroria Themelore në Prizren, Departamenti i Krimeve të Rënda, ka ngritur aktakuzë ndaj të pandehurit B.P., në cilësinë e personit të autorizuar të operatorit ekonomik B. Sh.P.K., dhe ndaj vetë kompanisë B. Sh.P.K., për dyshimin e kryerjes së veprës penale "Keqpërdorimi dhe mashtrimi në prokurimin publik", sipas nenit 415, paragrafi 2 të Kodit Penal të Republikës së Kosovës.
Aktakuza bazohet në kontratën publike të lidhur më 22 dhjetor 2023 në Dragash, me titull "Furnizimi me gjashtëmbëdhjetë copë aparate fotokopjuese për shkolla të Komunës së Dragashit".
Sipas pretendimeve të prokurorisë, i pandehuri B.P. ka shkelur rregullat e prokurimit publik duke mos zbatuar detyrimet kontraktuale. Në vend të dorëzimit të 16 aparateve të reja, u furnizuan aparate të ri-fabrikuara, pra pajisje të përdorura dhe të servisuara, ku u vendosën vetëm pjesë të reja shpenzuese.
Me këto veprime, Komunës së Dragashit i është shkaktuar dëm ekonomik dhe buxhetor, sepse pajisjet e ri-fabrikuara kanë qëndrueshmëri më të ulët, kërkojnë më shumë mirëmbajtje dhe mund të krijojnë kosto shtesë krahasuar me ato të reja.
Prokurori i çështjes i ka propozuar gjykatës që, pas shqyrtimit gjyqësor, administrimit dhe vlerësimit të provave, të pandehurit të shpallen fajtorë dhe të dënohen sipas ligjit.