Dy zjarrfikës kanë humbur jetën në krye të detyrës, ndërsa po luftonin me flakët në ishullin e Kretës, njoftoi sot shërbimi kombëtar i zjarrfikësve grekë. Lajmin e konfirmoi zëvendëszëdhënësi i këtij institucioni, Yiannis Artopios.
Ndërkohë, një situatë kritike po zhvillohet edhe në ishullin e Parosit, në detin Egje, ku një zjarr i fuqishëm ka dalë jashtë kontrollit. Për shkak të përhapjes së shpejtë të flakëve, autoritetet kanë urdhëruar evakuimin e disa komuniteteve, duke u kërkuar banorëve të zhvendosen drejt plazheve të afërta. Sipas mediave greke, si Proto Thema dhe Kathimerini, fshati Agkairia konsiderohet zona më e rrezikuar.
Operacioni i shuarjes së zjarrit në ishullin e Kikladeve, i nisur që prej ditës së martë, ka kërkuar përforcime shtesë nga ishujt fqinjë, si Naksos dhe Siros, si dhe nga Greqia kontinentale. Temperaturat e larta të stinës, bimësia e tharë dhe erërat e forta, të cilat parashikohet të forcohen gjatë ditës, kanë vështirësuar ndjeshëm ndërhyrjen e forcave zjarrfikëse.
Në kuadër të përforcimit të kapaciteteve përballë kërcënimit të zjarreve, Greqia ka investuar ndjeshëm vitet e fundit. Shërbimi zjarrfikës aktualisht disponon 85 avionë për shuarjen e zjarreve dhe një personel prej rreth 18 mijë punonjësish. Përveç mjeteve ajrore, në zonat me rrezik të lartë janë instaluar më shumë se 100 baza dronësh për zbulimin e hershëm të vatrave, ndërsa monitorimi kryhet edhe përmes katër satelitëve të posaçëm.
Përditësime
Bilanci i viktimave nga zjarret në Greqi është rritur në 3 zjarrfikës të vdekur. Autoritetet konfirmuan se dy prej tyre humbën jetën në Kretë si pasojë e orientimit të pamundur nga tymi i dendur, ndërsa i treti pësoi atak kardiak gjatë operacioneve në Greqinë kontinentale. Gjatë 24 orëve të fundit janë regjistruar 37 vatra të reja zjarri, ndërsa operacionet ajrore u ndërprenë gjatë natës për shkak të kushteve të pafavorshme atmosferike.