Tre zjarrfikës kanë humbur jetën në dy episode të ndryshme gjatë ditës së mërkurë, teksa po përballeshin me flakët që kanë përfshirë zona të ndryshme të Greqisë. Në ishullin e Kretës, konkretisht në zonën e Rethymnos, dy zjarrfikës humbën jetën pasi mbetën të rrethuar nga flakët në një zonë të izoluar.
Ndërsa burimet ofrojnë të dhëna të ndryshme për moshën e viktimave në Kretë, autoritetet po hetojnë ngjarjen ku automjeti i tyre është gjetur i djegur plotësisht. Tymi i dendur dyshohet se ka ndikuar në humbjen e orientimit të tyre. Departamenti i Zjarrfikësve ka shprehur ngushëllimet për efektivët që ranë në krye të detyrës, duke theksuar sakrificën e tyre për mbrojtjen e jetës dhe mjedisit.
Një viktimë e tretë u shënua në zonën e Gjithios, në Peloponez. Bëhet fjalë për shefin e zyrës rajonale të zjarrfikësve në Lakoni, 30 vjeç, i cili ndërroi jetë si pasojë e një ataku kardiak. Sipas policisë, gjendja shëndetësore e tij u rëndua nga lodhja e skajshme dhe tensioni fizik gjatë operacionit 24-orësh për shuarjen e zjarrit që ka përfshirë qindra hektarë në atë rajon.
Beteja me flakët vazhdon me intensitet të lartë në disa zona të tjera, përfshirë ishullin Paros, Mitilini dhe në Kretë, ku vatra e zjarrit ka krijuar një front prej më shumë se 15 kilometrash mes Rethymnos dhe Hanias. Kushtet atmosferike mbeten sfiduese, me temperatura që arrijnë 40 gradë Celsius dhe erëra që shkojnë deri në 8 ballë të shkallës Bofor.
Si pasojë e rrezikut të lartë, autoritetet kanë evakuuar rreth 2 mijë turistë dhe banorë nga zona e Hanias përmes mjeteve detare, pasi rrugët tokësore ishin të pasigurta. Mbrojtja Civile ka paralajmëruar se situata pritet të mbetet alarmante edhe për 48 orët e ardhshme, duke u bërë thirrje qytetarëve për kujdes maksimal dhe zbatim të urdhrave zyrtarë.
Përditësime
Autoritetet greke kanë përditësuar bilancin e tragjedisë në Krya Vrysi të Kretës, ku humbën jetën tre zjarrfikës. Burime zyrtare konfirmuan se dy prej viktimave ishin të moshës 25 dhe 58 vjeç. Trupat u gjetën jashtë automjetit, çka sugjeron përpjekje për t’u larguar nga flakët. Ndërkohë, dy zjarrfikës të tjerë ndodhen në spital në gjendje të rëndë. Për shuarjen e vatrave, qeveria greke ka aktivizuar mekanizmin e asistencës ndërkombëtare të Bashkimit Evropian.
Autoritetet greke kanë saktësuar se viktimat në Kretë janë dy persona të moshës 23 dhe 27 vjeç. Ndërkohë, Reuters konfirmon se viktima në Peloponez ishte një zjarrfikës që humbi jetën gjatë operacionit për shuarjen e flakëve. Përtej Greqisë, Qendra e Emergjencave e Bashkimit Evropian ka paralajmëruar për rrezik të lartë zjarresh në Itali, Francë dhe Spanjë.
Autoritetet konfirmuan se dy zjarrfikësit e humbur në Kretë ishin të moshës 58 dhe 25 vjeç. Për përforcimin e operacioneve, Mbrojtja Civile ka dislokuar 224 zjarrfikës shtesë dhe 53 automjete. Ndërkohë, Kryqi i Kuq po menaxhon evakuimin në Iraklio, duke ofruar ambiente strehimi për qytetarët e zhvendosur. Vatrat e zjarrit janë përhapur në Plomari (Lesvos) dhe Sitia, ndërsa në Agia Galini raportohen dëme të konsiderueshme në infrastrukturën bujqësore dhe stane.