Platforma e-Albania, e përdorur për procedura administrative dhe ngarkim certifikatash, po përballet me vonesa dhe pengesa prej një jave. Bizneset dhe kontabilistët raportojnë se nuk arrijnë të kryejnë veprime të thjeshta gjatë orarit normal, pasi sistemi reagon vetëm në orët e vona të mbrëmjes.
Një biznes deklaroi se platforma nuk funksionon si duhet që nga java e kaluar. "Nuk po arrijmë të veprojmë as për ndryshimet më të thjeshta, si p.sh. për ngarkim të certifikatës. Vetëm në orët e vona të darkës arrijmë të kryejmë ndonjë procedurë", tha ai. Një tjetër biznes shtoi: "Duhet të qëndrosh vetëm në e-Albania që të mund të mbyllësh diçka. Situata është prej një jave e tillë".
Bizneset paralajmërojnë se këto vonesa ndikojnë në aktivitetin e tyre të përditshëm, duke rritur kostot dhe shpërqendruar nga objektivat. Shqiptarët përdorin shërbimet online të e-qeverisjes më shumë se mesatarja e Bashkimit Europian, por kjo lidhet me tentativat e shumta ditore për të marrë shërbimin.
Kjo nuk është hera e parë. Për javë të tëra, sistemi Selfcare, i përdorur gjerësisht nga bizneset, nuk ka qenë funksional. Disa ditë më parë, probleme u shfaqën edhe me faqet qeveritare me domen .gov.al, të cilat nuk hapeshin.
Probleme hasin edhe individët. Elona, që jeton jashtë shtetit, po tenton të ngarkojë lejen e legalizimit për të aplikuar për certifikatën e pronësisë, por e ka të pamundur për shkak të pengesave në platformë.