Edi Rama, kryeministër dhe kryetar i Partisë Socialiste, zhvilloi të mërkurën një mbledhje me deputetët dhe ish-deputetët socialistë të qarkut të Tiranës. Gjatë takimit, ai u kërkoi të pranishmëve të dalin në terren për të takuar qytetarët dhe për të forcuar organizimin e brendshëm.
Rama theksoi nevojën për koordinim mes deputetëve dhe Bashkisë së Tiranës në evidentimin e problematikave, të cilat më pas do të raportohen në mbledhjet e ardhshme. Ai kërkoi angazhim më të madh nga të gjithë, në veçanti nga Bashkia e Tiranës, sidomos sa i përket hapësirave publike.
Sipas burimeve, kryeministri u tha të pranishmëve: “U kam thënë se mungesa e kryetarit të zgjedhur do të jetë një problem, por ju nuk e keni marrë shumë seriozisht në atë kohë”. Një burim specifikoi mungesën e Erion Veliaj si kryetar.
Pritet ngritja e një grupi pune nën drejtimin e Ogerta Manastirliu për të identifikuar të gjitha problematikat dhe për t’i raportuar ato në mbledhjet e tjera. Në mbledhje foli edhe Erion Braçe, i cili ngriti shqetësimet e zonës së tij elektorale dhe kërkoi zgjidhje.
Gjatë kësaj jave, në veçanti ditën e nesërme në orën 09:00 në selinë e Partisë Socialiste, pritet një takim me drejtuesit e njësive administrative të Tiranës.