Kryeministri Edi Rama ka mohuar kategorikisht pretendimet se ai është "Kumbari" i një sistemi korruptiv në Shqipëri, gjatë një interviste për gazetën prestigjioze Financial Times. Deklarata vjen si përgjigje ndaj protestave masive që po zhvillohen prej më shumë se tri javësh në Tiranë, të cilat janë nxitur nga projekti për ndërtimin e një resorti luksoz në ishullin e Sazanit dhe në zonën e Zvërnecit.
Sipas Ramës, vëmendja e shtuar ndaj këtij projekti dhe protestat e organizuara janë të lidhura kryesisht me qëndrimet politike kundër ish-presidentit amerikan Donald Trump dhe dhëndrit të tij, Jared Kushner. "Nëse nuk do të ishte Jared Kushner, askujt nuk do t’i interesonin flamingot, Shqipëria apo asgjë tjetër. E gjithë kjo vjen nga urrejtja ndaj Trump", u shpreh kryeministri.
Lidhur me situatën e rendit dhe hetimeve për pastrim parash, Rama pranoi se ky fenomen ekziston, por e cilësoi të ekzagjeruar perceptimin se ekonomia shqiptare bazohet në këto aktivitete. "Të thuash se ekonomia shqiptare bazohet te pastrimi i parave është e tmerrshme. Pastrimi i parave është pjesë e ekonomisë sonë, por nuk është një problem kaq i madh", theksoi ai.
Aktualisht, Prokuroria e Posaçme kundër Korrupsionit dhe Krimit të Organizuar (SPAK) ka lëshuar urdhër-arreste për 20 biznesmenë, të dyshuar për trafik ndërkombëtar droge dhe pastrim parash. Një ndër personat nën hetim është shtetasi shqiptaro-amerikan Artur Shehu, i cili më parë ka zotëruar prona në zonën e zhvillimit të projektit. Në kuadër të këtyre hetimeve, autoritetet kanë ngrirë pagesa me vlerë 128 milionë euro. Kryeministri Rama ka pohuar se investimi i Kushnerit mbetet i rregullt dhe se nuk ka lidhje me hetimet penale ndaj ish-pronarëve të tokave.