Kryeministri i Shqipërisë, Edi Rama, gjatë një konference për shtyp me gazetarë të Bashkimit Europian, deklaroi se vëmendja ndërkombëtare ndaj protestave për projektet në Sazan dhe Zvërnec është nxitur nga përfshirja e emrit të Donald Trump. Sipas tij, reagimi është i lidhur me figurën e ish-presidentit amerikan dhe jo me çështjet mjedisore.
Rama sqaroi se kur Jared Kushner dhe Ivanka Trump shprehën interesin për të investuar në Shqipëri, rrethanat politike të Donald Trump në SHBA ishin të paqarta. "Kur ata erdhën këtu, nuk ishte e qartë nëse Donald Trump do të shkonte në burg apo në Shtëpinë e Bardhë. Për mua, ata ishin investitorë amerikanë që kërkonin mundësi zhvillimi", tha kryeministri.
Duke iu përgjigjur aludimeve për lidhje politike, Rama ironizoi etiketimet e ndryshme ndaj tij, duke përmendur se si është akuzuar herë si "njeri i Soros" dhe herë si "njeri i Kushner". Ai theksoi se synimi i tij si kryeministër është tërheqja e investitorëve dhe se Shqipëria nuk duhet të shërbejë si terren për betejat politike të vendeve të tjera.
Lidhur me projektet, kreu i qeverisë u shpreh se çdo nismë duhet të zhvillohet mbi bazën e fakteve dhe transparencës. "Përgjigjja do të jepet përmes projektit: nëse do të japë rezultatet e duhura, do të vazhdojë, nëse jo, do të përmirësohet", deklaroi Rama. Ai shtoi se në planet për këto zona synohet një shtim prej 25% i natyrës dhe gjelbërimit, në bashkëpunim me arkitektë ndërkombëtarë.
Përditësime
Kryeministri Edi Rama deklaroi për Associated Press se interesi i Jared Kushner për investime në Shqipëri nisi pas një vizite në Durrës. Sipas Ramës, propozimi zyrtar u konkretizua muaj më pas në Davos, ndërsa kompania e lidhur me Kushner ka përfituar tashmë statusin e investitorit strategjik.