Kryeministri Edi Rama ka reaguar përmes një videoje të publikuar në rrjetet sociale, pak kohë pas seancës maratonë në Kuvend, ku u miratua reforma e re administrativo-territoriale. Vendimi u mor me 85 vota pro, pavarësisht kundërshtimeve nga ana e opozitës dhe rezervave të shprehura nga disa deputetë të mazhorancës. Videoja, e realizuar me inteligjencë artificiale, paraqet një luan dhe shoqërohet nga një rrëfim mbi forcën, sprovat dhe rrugëtimin e vështirë përballë pengesave.
Sipas raportimeve, procesi i miratimit në Parlament u shoqërua me debate dhe tensione, ndërsa votimi pasoi një periudhë ultimatumesh drejtuar ligjvënësve të Partisë Socialiste, të cilët u paralajmëruan me përjashtim nëse nuk mbështesnin nismën. Paralelisht me zhvillimet parlamentare, vendi është përballur prej 4 muajsh me protesta të qytetarëve, të cilët kërkojnë dorëheqjen e kryeministrit, duke përfshirë këtu edhe banorët e prekur nga reforma për bashkitë e vogla.
Në mesazhin që shoqëron pamjet, kryeministri Rama nuk ka shtuar komente personale, duke lënë videon të përcjellë mesazhin e saj. Teksti i videos flet për një bashkëbisedim me Zotin rreth vështirësive të jetës, duke theksuar se "njerëzit e gabuar" nuk do të lejohen të pengojnë qëllimin e përcaktuar. Ndër temat kryesore të trajtuara në mesazh janë kalitja e karakterit përmes sprovave, ngjashmërisht me hekurin që kalitet në zjarr, dhe nevoja për të vazhduar përpara edhe kur rruga bëhet e stuhishme.