Edi Rama, kryeministër i Shqipërisë, reagoi më 4 shkurt 2026 në rrjetin social X ndaj deklaratës së Shoqatës së Prokurorëve të Republikës së Shqipërisë, e cila shprehu solidaritet me shoqatat e gjyqtarëve në debatin për rritjen e pagave.
Rama e cilësoi si "absurditet total" pretendimin se qeveria synon uljen e pagave të gjyqtarëve. Sipas tij, gjyqtarët dhe prokurorët përbëjnë kategorinë më të privilegjuar në piramidën e pagave shtetërore, ndërsa mosngritja e pagave aq sa kërkojnë shoqatat nuk përbën ulje.
Ai theksoi se nuk ka pasur asnjë tentativë apo nismë për uljen e pagave dhe se vëmendja e qeverisë ndaj pushtetit gjyqësor mbetet e lartë. Që nga thuajse një vit, qeveria po punon për ndërtimin e një Poli Drejtësie, si askund tjetër në Ballkan, për të siguruar kushte pune të barabarta me pagat, ndër më të lartat në rajon.
Në fund të postimit, Rama i drejtoi një pyetje Shoqatës së Prokurorëve, e cila sipas tij është ende e paregjistruar sipas ligjit, por brenda afatit ligjor: "Për shkelmimin e vazhdueshëm si askund në Europë të prezumimit të pafajësisë dhe kthimin e arresteve me burg pa gjyq në një praktikë rutinë, e cila e ka njollosur Shqipërinë botërisht, duke na renditur si dele të zezë në bisht të kontinentit europian dhe kthyer në subjekt shqetësimi të Komitetit të Këshillit të Europës për Parandalimin e Torturës, a keni ndonjë gjë për të deklaruar?"
Ky reagim vjen në vazhdimësi të debatit publik mes kryeministrit dhe shoqatave të gjyqtarëve për kërkesën e tyre për rritje pagash, e cila po shqyrtohet në Gjykatën Kushtetuese.
Përditësime
Shoqata e Prokurorëve publikoi dokumentin e regjistrimit të saj nga viti 2025, duke kundërshtuar pretendimin e Kryeministrit Edi Rama se shoqata është e paregjistruar.
Prokurorët e akuzuan Ramën për «përbaltje kryeministrore publike, mediatike, tërësisht histerike» dhe për një fushatë për të nxitur opinionin kundër magjistratëve.
Sipas faqes zyrtare të Prokurorisë së Përgjithshme, shoqata u krijua vitin e kaluar (2025).