Në Vlorë u zhvillua edicioni i 27-të ndërkombëtar i garës së sporteve ajrore Albania Open – PGA Grand Prix, një kompeticion prestigjioz hedhjeje me parashutë. Garën e ndoqën qindra qytetarë dhe turistë në trampolinën e re pranë bypass-it të Vlorës.
Kryeministri Edi Rama ndau në rrjetet sociale pamje nga eventi, duke shkruar se 98 pilotët më të mirë nga mbi 20 shtete të botës sollën emocione të veçanta. Ai theksoi energjinë spektakolare të garës dhe uroi një ditë të mbarë.
Aktiviteti zgjati katër ditë dhe kulmoi me mbrëmjen gala, ku u ndanë çmimet për fituesit. Organizatori Alket Islami, i cili e zhvillon këtë garë prej 27 vitesh në Shqipëri, deklaroi se edicioni i sivjetmë ishte ndër më të fortat, me diferencë vetëm 1 cm mes vendit të parë dhe të dytë.
Gara u transmetua live nga RTSH. Islami e vlerësoi eventin si mundësi të madhe për promovimin e imazhit të Shqipërisë, duke sjellë adrenalinë në qytetin bregdetar.
Qindra vizitorë gjallëruan qytetin në prag të sezonit veror, duke dhënë shtysë hotelerisë dhe gastronomisë lokale. Rama e cilësoi Vlorën si trampolinë për promovimin e Shqipërisë përmes sportit dhe turizmit, duke e renditur si qendër të sporteve ajrore në rajon.