Sheshi Skënderbej në kryeqytet mirëpret sot finalen e turneut ndërkombëtar të padelit, FIP Platinum Albania. Ky kompeticion, që po zhvillohet për herë të parë në Shqipëri, ka transformuar qendrën e Tiranës në një arenë moderne për ndeshjet e këtij sporti, duke e bërë vendin pjesë të hartës ndërkombëtare të kësaj disipline.
Turneu FIP Platinum përfaqëson një nga nivelet më të larta të CUPRA FIP Tour, qarkut global të Federatës Ndërkombëtare të Padelit (FIP). Në këtë garë marrin pjesë rreth 200 sportistë ndërkombëtarë, ndërsa fituesit do të përfitojnë 300 pikë për renditjen botërore dhe një fond çmimesh që varion nga 120 mijë deri në 150 mijë euro.
Kryeministri i Shqipërisë, Edi Rama, përmes një postimi në rrjetet sociale, u ka bërë thirrje qytetarëve dhe sportdashësve që të ndjekin nga afër këtë finale, duke e ndërlidhur atmosferën festive me finalen e UEFA Champions League.
Infrastruktura teknike dhe fusha e garës janë instaluar në shesh prej disa ditësh, periudhë gjatë së cilës publiku ka pasur mundësinë të ndjekë ndeshjet paraprake. Hyrja për vizitorët që dëshirojnë të ndjekin ndeshjen finale në shesh është falas.