Ish-deputeti i Partisë Demokratike, Edmond Spaho, ka reaguar publikisht ndaj pretendimeve të bëra nga Sali Berisha, i cili deklaroi se ndaj protestuesve të mbledhur te Kuvendi janë përdorur lëndë kimike të ngjashme me ato të luftës.
Në qëndrimin e tij, Spaho u shpreh se prodhimi dhe përdorimi i armëve kimike në fushëbetejë janë të ndaluara rreptësisht përmes traktateve ndërkombëtare. Sipas tij, pretendimi se këto lëndë mund të jenë përdorur në protestën e zhvilluar në Tiranë tregon jo vetëm mungesë të lidhjes me realitetin, por edhe një përpjekje për të gënjyer me qëllim.
Sipas Spahos, kjo gjuhë ndikon negativisht në besueshmërinë e Partisë Demokratike te qytetarët, duke bërë që ata të mos e mbështesin. Ai theksoi se aspirata për të ardhur në pushtet nuk mund të realizohet përmes deklaratave që ai i cilësoi si "broçkulla".
Ish-deputeti paralajmëroi se, nëse partia vijon me këtë strategji, ajo rrezikon të mbetet në opozitë për një kohë të gjatë. Në mbyllje të reagimit të tij, Spaho përdori shprehjen popullore "Koka bën, koka pëson" për të ilustruar pasojat e kësaj qasjeje politike.