Skuadra e Egnatias ka regjistruar një barazim 1-1 në ndeshjen e parë të raundit të parë eliminator të Champions League kundër Petrokubit, zhvilluar në stadiumin Zimbru të Moldavisë.
Ndeshja nisi në favor të vendasve, të cilët kaluan në avantazh që në sekondat e para falë golit të Popeskut. Sulmuesi moldav përfitoi nga një gabim në mbrojtjen shqiptare, pas një pasimi të pasaktë të kapitenit Aleksi. Megjithatë, ekipi i drejtuar nga Nevil Dede reagoi dhe arriti të barazojë shifrat në minutën e 35-të me anë të Altin Kryeziut, pas një kombinimi me Haimes.
Situata u vështirësua për kampionët e Shqipërisë në fund të pjesës së parë, kur kapiteni Aleksi u ndëshkua me karton të kuq pas ndërhyrjes së sistemit VAR, duke e lënë ekipin me një lojtar më pak për të gjithë pjesën e dytë. Gjatë fraksionit të dytë, presioni i skuadrës moldave ishte i lartë, por portieri Dajsinani u dallua me pritje vendimtare, duke mbajtur portën të paprekur dhe duke shmangur golin e avantazhit për Petrokubin.
Ky rezultat e lë çështjen e kualifikimit të hapur për takimin e kthimit, i cili do të zhvillohet në Rrogozhinë më 15 korrik, në orën 21:00.