Në nderim të 12 qershorit, Ditës së Çlirimit të Republikës së Kosovës, në mjediset e Bibliotekës Kombëtare të Kosovës "Pjetër Bogdani" u hap ekspozita "KFOR and Kosova +25". Ky projekt fotodokumentar, i realizuar nga fotografi britanik Nick Sidle, rikthehet për publikun pas 25 vjetësh në një format të restauruar dhe të zgjeruar.
Ekspozita përmbledh fotografi të realizuara përgjatë një viti, të cilat dokumentojnë përpjekjet e shoqërisë për rindërtim, si dhe angazhimin e trupave paqeruajtëse të KFOR-it, të cilat vinin nga nëntë shtete të ndryshme. Përtej aspektit ushtarak, imazhet përqendrohen në dimensionin human, duke pasqyruar përditshmërinë, sfidat dhe përpjekjet e qytetarëve për stabilitet në periudhën e hershme të pasluftës.
Në ceremoninë e hapjes morën pjesë përfaqësues të institucioneve, përfshirë zëvendësministren e Kulturës, Nora Arapi Krasniqi, dhe sekretarin e Ministrisë së Kulturës, Bislim Bislimi. Drejtoresha e Bibliotekës Kombëtare, Blerina Rogova Gaxha, theksoi se 12 qershori është një datë historike që fton publikun të reflektojë mbi përjetimet individuale dhe kujtesën kolektive.
Ekspozita ishte prezantuar për herë të parë në vitin 2001, ndërsa versioni aktual është një bashkëpunim ndërmjet Ministrisë së Kulturës dhe organizatës Heartstone.