Në muajin qershor, në Muzeun e Arteve të Bukura të Chambéry, Francë, do të hapet ekspozita e përkohshme “Ikonat e Shqipërisë – Thesaret e Muzeut Kombëtar të Artit Mesjetar të Korçës”. Kjo ngjarje kulturore prezanton rreth 45 ikona shqiptare nga koleksioni i këtij muzeu në Korçë.
Ministri i Kulturës, Blendi Gonxhja, njoftoi se ekspozita është fryt i bashkëpunimit mes qyteteve Korçë–Chambéry, me mbështetjen e Ambasadës së Francës në Shqipëri dhe Ministrisë së Turizmit, Kulturës dhe Sportit. Kjo nismë synon hapjen evropiane dhe dialogun ndërkulturor.
Publiku francez do të mund të zbulojë trashëgiminë artistike shqiptare, ende pak të njohur në Francë dhe Bashkimin Evropian. Ekspozita vlerëson cilësinë e ikonave, të cilat kanë mbijetuar pavarësisht shkatërrimeve të shekullit të njëzetë. Ajo nxjerr në pah veçantinë e artit të krishterë mesdhetar dhe dialogun mes traditës së ikonës ortodokse dhe artit fetar mesjetar e rilindas italian.
Përditësime
Fjoralba Prifti, drejtoresha e Muzeut Kombëtar të Artit Mesjetar në Korçë, shpjegoi se një grup pune ka punuar disa muaj për përzgjedhjen e ikonave.
"Kemi zgjedhur ikona nga periudha dhe shkolla artistike të ndryshme, me fokus te motivet e kishës së burimit jetëdhënës," tha ajo.