Shqipëria dhe kultura e saj do të jenë kryefjalë e jetës kulturore në qytetin Shamberi (Chambéry) të Francës për vitin 2026. Ky program special, i kushtuar arteve, muzikës, letrave dhe kulturës shqipe, vjen falë partneritetit të krijuar që nga viti 2022 midis bashkive të Shamberit dhe Korçës. Lajmi është publikuar në faqen zyrtare të bashkisë së Shamberit.
Ekspozita kryesore
Një nga ngjarjet kyçe është ekspozita "Ikona të Shqipërisë", që do të zhvillohet nga maji deri në nëntor në Muzeun e Arteve të Bukura të Shamberit. Në të do të shfaqen 45 vepra arti të rëndësishme nga trashëgimia kombëtare shqiptare e shekujve XIV deri në XX, pjesë e fondit të Muzeut Kombëtar të Artit Mesjetar të Korçës.
Evente të tjera
Krahas ekspozitës, programi përfshin:
- Konferenca si pjesë e Muajit të Evropës;
- Prania e partnerëve shqiptarë në Tregun e Kontinenteve;
- Pjesëmarrja e artistëve dhe grupeve folklorike nga Korça në Festivalin e Kulturave Botërore;
- Projekte krijimi artistik dhe teatral që bashkojnë të rinj dhe profesionistë nga të dy vendet.
Lidhje historike
Lidhja midis Korçës dhe Francës është historike dhe e fortë. E quajtur “Parisi i Vogël” për ndikimin frankofon, Korça dallohet për traditën kulturore, arkitekturën dhe rolin në zgjimin kombëtar shqiptar. Midis dy luftërave botërore, Liceu Francez në Korçë formoi elitat intelektuale shqiptare. Kujtimi i tij ringjallet me hapjen e liceut të ri franko-shqiptar në Korçë, projekt i përbashkët midis Shqipërisë dhe Francës me fokus te shkencat dhe e ardhmja.