Gjashtë shtetas shqiptarë pritet të mbërrijnë sot në Shqipëri, pasi autoritetet e Emirateve të Bashkuara Arabe kanë miratuar ekstradimin e tyre. Personat në fjalë ishin shpallur në kërkim ndërkombëtar, nën akuzat për veprimtari kriminale të kryera në kuadër të grupeve të strukturuara.
Sipas njoftimit zyrtar, të ekstraduarit janë:
- Kristi Qirici (alias Jetmir Hoxha, Jetmir Qirici), 44 vjeç
- Shkëlzen Kraja, 44 vjeç
- Aleks Pepaj (alias Shkëlqim Pepaj), 38 vjeç
- Devit Patrut (alias Elidon Skëndaj, Devid Boraj, Fatmir Pepaj), 39 vjeç
- Ilir Lazri (alias Ilir Sula), 30 vjeç
- Merxhan Celiku, 34 vjeç
Detaje mbi aktivitetin kriminal
Sipas të dhënave, individët e ekstraduar lidhen me disa dosje hetimore. Kristi Qirici dhe Shkëlzen Kraja dyshohen si pjesë e një grupi që kultivonte dhe trafikonte lëndë narkotike drejt Greqisë gjatë viteve 2019-2021. Aleks Pepaj dhe Ilir Lazri lidhen me grupin kriminal të Jetmir Pepës, të hetuar për trafik droge nga Amerika Latine drejt vendeve të Bashkimit Evropian.
Merxhan Celiku akuzohet për mashtrim kompjuterik si pjesë e grupit të Amant Josifit, ndërsa Devit Patrut është në kërkim si anëtar i grupit të Ermir Ndreajt, i njohur për trafik ndërkombëtar kokaine.