Sokol Ndreka, 51 vjeç, shtetas shqiptar, u ekstradua më 10 janar 2026 nga Gjermania në Shqipëri. Ai ishte i shpallur në kërkim ndërkombëtar pas vendimit të Gjykatës së Shkallës së Parë të Juridiksionit të Përgjithshëm Tiranë në vitin 2024, e cila e dënoi me 6 vite burgim për veprat penale "Ndihma për kalim të paligjshëm të kufijve" dhe "Largimi i të burgosurit nga vendi i qëndrimit".
Ekstradimi u realizua falë koordinimit ndërmjet Drejtorisë së Interpol Tiranës dhe Interpol Wiesbaden në Gjermani, në kuadër të operacionit ndërkombëtar të koduar "The Wanted". Ndreka u arrestua në Gjermani si rezultat i këtij bashkëpunimi dhe u kthye në Shqipëri për të vuajtur dënimin.
Ngjarja lidhet me 31 tetor 2022, kur në rrugën dytësore Tiranë–Durrës u ndalua një automjet ku udhëtonin 15 shtetas të huaj, emigrantë të paligjshëm. Nga hetimet e kryera rezultoi se Sokol Ndreka ishte i përfshirë në aktivitetin e paligjshëm të trafikimit të emigrantëve, duke ndihmuar në kalimin e tyre të paligjshëm të kufijve.