Shtetasi Florjan Vuka, i njohur edhe me mbiemrin Vathaj, ka mbërritur në Shqipëri pas ekstradimit nga Greqia. Vuka ishte shpallur në kërkim ndërkombëtar nga Prokuroria e Posaçme (SPAK) për shkak të përfshirjes së tij të dyshuar në një strukturë kriminale për trafikun ndërkombëtar të lëndëve narkotike.
Sipas dosjes hetimore të drejtuar nga prokurori Alfred Shehu, grupi kriminal nën drejtimin e Jetmir Pepës shtrinte aktivitetin e tij në disa vende, përfshirë Amerikën Latine, Belgjikën dhe Holandën. Hetimet kanë dokumentuar se grupi ka trafikuar në total rreth 7.5 tonë kokainë nëpërmjet të paktën tetë operacioneve të ndara gjatë periudhës 2019-2021.
Pas mbërritjes në territorin shqiptar, Vuka do të paraqitet para Gjykatës së Posaçme për rivlerësimin e masës së sigurisë. Nëpërmjet një procedure të shortit elektronik, është caktuar gjyqtarja Alma Kodraliu, e cila do të vendosë nëse do të mbetet në fuqi masa e sigurisë “arrest në burg”, e caktuar më parë në mungesë, apo nëse do të ndryshohet kjo masë.
Çdo person prezumohet i pafajshëm deri sa të vërtetohet fajësia e tij me vendim gjyqësor të formës së prerë.
Përditësime
Burime zyrtare bënë me dije se shtetasi Florjan Vuka njihet në dokumente edhe me mbiemrin Vathaj. Ky detaj është shtuar në dosjen e tij hetimore për procedurat e mëtejshme gjyqësore.