Shtetasi Sajmir Kolaveri është ekstraduar nga Italia drejt Shqipërisë në kuadër të operacionit të koduar "The Wanted". 44-vjeçari ishte shpallur në kërkim ndërkombëtar, pasi Gjykata e Posaçme e Shkallës së Parë kundër Korrupsionit dhe Krimit të Organizuar (GJKKO) kishte caktuar ndaj tij masën e sigurisë "arrest në burg", me vendimin e datës 25 shtator 2025.
Sipas hetimeve, i akuzuari dyshohet se ka bashkëpunuar me pjesëtarë të një grupi të strukturuar kriminal për vrasjen e shtetasit Klevis Lleshi, ngjarje e ndodhur më 5 gusht 2020. Pas vrasjes, autorët dyshohet se kanë transportuar dhe varrosur kufomën në fshatin Shpërdhet të Mamurrasit.
Ndaj Kolaverit rëndojnë akuzat për veprat penale:
- Vrasje për gjakmarrje
- Fshehja ose asgjësimi i kufomës
- Mbajtja pa leje dhe prodhimi i armëve, armëve shpërthyese dhe municionit
- Kryerja e veprave penale nga organizata kriminale dhe grupi i strukturuar kriminal