Raffaele Afeltra, 69 vjeç, u gjet pa shenja jete brenda makinës së tij në zonën malore të Monti Lattari, në provincën e Napolit. Autoritetet italiane kanë nisur një hetim për të zbardhur dinamikën e atentatit, i cili dyshohet se është kryer nga persona ende të paidentifikuar.
Hetimet po koordinohen nga Prokuroria e Antimafias në Napoli. Pista kryesore që po ndiqet nga autoritetet është ajo e një përplasjeje për kontrollin e territorit, duke pasur parasysh të kaluarën e Afeltrës si një prej drejtuesve të klanit Afeltra-Di Martino. Viktima kishte qenë protagonist i luftërave të Kamorrës gjatë viteve ’80 dhe ’90, ndërsa në vitin 2019 ai u dorëzua pas një periudhe arratie për të vuajtur dënimin lidhur me vepra penale të zhvatjes.
Forcat e rendit janë duke analizuar kontaktet e 69-vjeçarit dhe lëvizjet e tij, për të përcaktuar nëse vrasja është një episod i izoluar apo shenjë e një rikthimi të konflikteve midis klaneve rivale për dominim në zonën e Pimonte.
Ndërkohë, vijon puna për mbledhjen e provave dhe ekspertizën balistike për të përcaktuar me saktësi dinamikën e ngjarjes dhe për të identifikuar autorët e këtij ekzekutimi.
Përditësime
Hetuesit zbardhën detaje të reja mbi ekzekutimin e Raffaele Afeltra, i njohur në qarqet kriminale me nofkën 'O’ Burraccione'. Policia konfirmoi se viktima u qëllua për vdekje me një armë gjahu të kalibrit 12. Ngjarja ndodhi brenda një prone në pronësi të vetë 69-vjeçarit. Burime zyrtare bënë me dije se Afeltra ishte kthyer në liri prej rreth tre vitesh, pas përfundimit të dënimit të tij të fundit.