Në orët e mëngjesit të kësaj të hëne, Valter Lleshi, 45 vjeç, është gjetur i vrarë me armë zjarri brenda automjetit të tij në fshatin Shkorret të bashkisë Mirditë. Sipas hetimeve paraprake, dyshohet se viktima është zënë në pritë nga persona ende të paidentifikuar, teksa ishte duke shkuar në vendin e tij të punës.
Lleshi punonte si shofer kamioni në një kompani që operon në nxjerrjen e inerteve nga lumi Mat. Në lidhje me këtë ngjarje, Policia e Shtetit ka nisur hetimet për të zbardhur rrethanat dhe për të identifikuar autorët, të cilët mbeten ende në kërkim.
Sipas informacioneve të bëra publike, viktima dyshohet se ka qenë i implikuar në vrasjen e Anton Kelit në Rrëshen në vitin 2020, ngjarje që asokohe u lidh me hakmarrje për prishje të pazareve të drogës. Gjithashtu, më 15 mars të këtij viti, Valter Lleshi kishte qenë objektiv i një tjetër atentati, ku një sasi lënde plasëse ishte vendosur në mjetin e tij të punës, ngjarje të cilës ai i kishte shpëtuar.