Fenomeni natyror El Nino, i cili shkaktohet nga ngrohja e pazakontë e ujërave të Oqeanit Paqësor, po zhvillohet me intensitet të lartë, duke u cilësuar nga ekspertët si një nga ngjarjet më të fuqishme të regjistruara në kohët moderne. Aktualisht, temperaturat e sipërfaqes së detit në zonat kyçe janë mbi 2°C mbi normalen, ndërsa në thellësinë 100 metra janë vërejtur anomali deri në 8°C. Kjo rezervë e madhe nxehtësie parashikohet t'i rrisë vlerat edhe më shumë gjatë muajve të ardhshëm.
Ndikimet globale dhe pasojat
Efektet e këtij fenomeni pritet të ndryshojnë modelet e motit në nivel global, duke rritur rrezikun për thatësira, zjarre dhe përmbytje. Në Australi parashikohet shtim i rrezikut për thatësira dhe zjarre, ndërsa në Peru, Ekuador dhe pjesë të Shteteve të Bashkuara mund të ketë reshje të dendura dhe përmbytje. Mbretëria e Bashkuar dhe Evropa Veriperëndimore gjithashtu mund të përballen me një vjeshtë më të lagësht dhe me stuhi.
Ekspertët theksojnë se megjithëse nuk ka prova që ndryshimet klimatike e bëjnë El Nino më të shpeshtë, ato mund t'i përkeqësojnë ndikimet e tij. Organizata e Kombeve të Bashkuara për Ushqimin dhe Bujqësinë (FAO) ka dhënë alarmin për pasiguri të rëndë ushqimore, pasi dëmtimi i prodhimeve bujqësore si kafja, orizi dhe kakaoja mund të çojë në rritje të çmimeve të ushqimeve, duke rrezikuar dhjetëra milionë njerëz.