Gjatë fundjavës, Policia e Elbasanit vuri në pranga një 59-vjeçar, banues në Elbasan, pasi dyshohet se tentonte të krijonte kontakte me të mitur me qëllim kryerjen e marrëdhënieve seksuale. Ndaj tij rëndon akuza për veprën penale “Marrëdhënie seksuale ose homoseksuale me të mitur”, mbetur në tentativë.
Sipas hetimeve paraprake, i dyshuari siguronte numrat e telefonit të të miturve përmes mashtrimit dhe joshjes. Më pas, ai komunikonte me ta dhe i ftonte për takime, të cilat fillimisht zhvilloheshin në ambiente publike, si kafene, ndërsa më tej i dyshuari përpiqej t'i dërgonte ata në banesën e tij.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme ligjore. Grupi hetimor po vijon punën për të dokumentuar plotësisht ngjarjen, si dhe për të verifikuar nëse ka persona të tjerë të përfshirë në këtë veprimtari të kundërligjshme.