Gjatë orëve të natës në qytetin e Elbasanit është regjistruar një incident ku dy automjete janë përfshirë nga flakët. Mjetet, një Audi me ngjyrë gri dhe një Volkswagen me ngjyrë të zezë, janë në pronësi të shtetasit Egli Hazisllari.
Shërbimet zjarrfikëse dhe forcat e policisë kanë mbërritur menjëherë në vendngjarje, duke bërë të mundur shuarjen e zjarrit dhe sigurimin e perimetrit për të parandaluar dëmet e mëtejshme. Sipas raportimeve, dëmet materiale janë të konsiderueshme, ku mjeti tip Volkswagen është djegur tërësisht, ndërsa mjeti tip Audi ka pësuar dëmtime të pjesshme në pjesën e përparme.
Autoritetet policore kanë ngritur një grup hetimor, i cili po punon nën drejtimin e prokurorisë për të zbardhur shkaqet e ngjarjes. Për momentin, hetimet janë përqendruar në verifikimin e tri pistave kryesore: një defekti teknik, një rasti aksidental ose një ngjarjeje të qëllimshme. Për këtë qëllim, po mblidhen prova në vendin e ngjarjes dhe po analizohen pamjet nga kamerat e sigurisë së zonës.
Përditësime
Policia e Elbasanit po heton si zjarrvënie të qëllimshme djegien e dy automjeteve në Bradashesh. Autoritetet po punojnë për identifikimin e autorëve dhe zbardhjen e rrethanave të ngjarjes.