Një elektricist 34-vjeçar, me inicialet A. N., humbi jetën mbrëmjen e 9 nëntorit në fshatin Bardhaj të Shkodrës, pasi dyshohet se ra në kontakt me rrymën elektrike gjatë riparimit të një defekti në një shtyllë elektrike. Ai u dërgua rreth orës 20:36 në Urgjencën e Spitalit Rajonal Shkodër, por mbërriti pa shenja jete.
Sipas informacionit paraprak të Policisë, disa familje në Bardhaj, të cilat kishin mbetur pa energji elektrike, e kishin thirrur elektricistin jashtë orarit të punës për të rikthyer furnizimin. Ndërhyrja dyshohet se është kryer pa njoftuar dispeçerinë e OSHEE-së.
Grupi hetimor ndodhet në vendngjarje dhe, nën drejtimin e Prokurorisë, po punon për sqarimin e plotë të rrethanave dhe dokumentimin ligjor të rastit. Shkaku dhe rrethanat e vdekjes po hetohen.