Eliminimi i Interit dhe Juventusit në fazën play-off të Ligës së Kampionëve ka ulur shanset e Italisë për të siguruar një ekip të pestë në këtë turne për edicionin e ardhshëm.
Sipas renditjes sezonale të UEFA-s për kampionatet, dy vendet e para sigurojnë nga një vend shtesë në turne. Anglia duket e siguruar për vendin e parë, pasi ka ende 9 ekipe në garë në tre kompeticionet evropiane.
Ky eliminim e ka lehtësuar pozicionin e vendeve para Italisë, si Gjermania dhe Spanja. Aktualisht, Gjermania është në vendin e dytë, Spanja në të tretin dhe Italia në të katërtin.
Italia ka pak shanse për përmirësim, sepse në Ligën e Kampionëve, që jep pikët më të larta, i ka mbetur vetëm Atalanta. Prandaj, duhet të mbështetet te performancat e skuadrave në turnetë e tjerë evropianë.