Mbrojtësi i krahut, Elseid Hysaj, ndodhet pranë një kapitulli të ri në karrierën e tij, pasi është kthyer në objektivin kryesor të skuadrës së Lecces. Pas përfundimit të kontratës me Lazion, lojtari aktualisht është i lirë në treg, fakt që ka përshpejtuar bisedimet mes palëve.
Sipas raportimeve të gazetarit Gianluca Di Marzio, negociatat janë në zhvillim e sipër dhe klubi nga Pulia synon të finalizojë marrëveshjen brenda ditëve në vijim. Drejtuesit e Lecces e vlerësojnë Hysajn si një përforcim me përvojë për repartin defensiv, duke pasur parasysh karrierën e tij të gjatë në kampionatin italian, ku ka luajtur më parë për Empolin, Napolin dhe Lazion.
Gjatë pesë viteve në Romë, Hysaj regjistroi 131 paraqitje në të gjitha kompeticionet, duke realizuar 2 gola dhe 4 asistime. Në sezonin e fundit, hapësirat për të ishin të kufizuara, duke u aktivizuar në vetëm 5 ndeshje të Serie A. Transferimi te Lecce shihet si një mundësi për të vazhduar karrierën në elitën e futbollit italian. Nëse marrëveshja finalizohet, 32-vjeçari do t'i bashkohet në skuadër mesfushorit shqiptar, Medon Berisha.
Përditësime
Mesfushori Ylber Ramadani është larguar zyrtarisht nga Lecce për t'u transferuar në kampionatin turk. Largimi i tij ka hapur rrugën për përforcime të reja në organikën e klubit italian, ku tashmë po diskutohet afrimi i mbrojtësit Elseid Hysaj.