Anëtari i Kryesisë së Lëvizjes Vetëvendosje, Elvis Hoxha, kërkoi falje pasi publikoi në rrjetet sociale një fotomontazh të manipuluar. Imazhi shfaqej si ballina e gazetës serbe Blic, në të cilën pretendohej se ministri i Jashtëm i Serbisë, Marko Gjuriq, kishte lavdëruar veprimin e deputetes së AAK-së, Time Kadrijaj. Incidenti në Kuvendin e Kosovës ndodhi një ditë më parë, kur deputetja Kadrijaj hodhi vezë në drejtim të kryeministrit në detyrë, Albin Kurti.
Pas publikimit, u konfirmua se ballina ishte një manipulim dixhital dhe se nuk ekzistonte asnjë deklaratë e tillë nga ana e Gjuriqit. Pas rreth gjashtë orësh, Hoxha e fshiu postimin dhe kërkoi falje përmes rrjeteve sociale, duke u shprehur se është bërë e vështirë të dallohet informacioni i vërtetë nga ai i rremë. Në postimin e tij fillestar, ai e kishte shoqëruar fotomontazhin me komentin: "Lëvdatat që nuk duhen".
Në lidhje me këtë rast reaguan edhe aktorë të tjerë politikë. Zëdhënësi i AAK-së, Kushtrim Xhemaili, e cilësoi materialin si pjesë e një lufte hibride të krijuar me inteligjencë artificiale, duke theksuar se fotomontazhi përmbante gabime në datë dhe në shkrimin e emrit të Prishtinës. Përveç Hoxhës, përmbajtje të ngjashme shpërndau edhe përkrahësi i Lëvizjes Vetëvendosje, Sadri Ramabaja, ndërsa vetë deputetja Time Kadrijaj reagoi duke e konsideruar këtë si një përpjekje për manipulim, duke shtuar: "Ju kanë rënë maskat. As Beogradi s’ju shpëton!".
Përditësime
Deputetja e Partisë Demokratike të Kosovës, Blerta Deliu, kërkoi zyrtarisht shkarkimin e Elvis Hoxhës nga pozita e këshilltarit të kryeministrit Albin Kurti. Deliu e cilësoi heshtjen e Kurtit ndaj këtij rasti si përgjegjësi direkte politike. Përveç Hoxhës, hulumtimet treguan se postimin e rremë e kanë shpërndarë edhe disa profesorë të tjerë universitarë, të cilët janë aktivistë të Lëvizjes Vetëvendosje.