Gjatë protestës së zhvilluar në Tiranë, një qytetar i ardhur nga diaspora mbajti një fjalim para pjesëmarrësve, ku shprehu nevojën për reforma rrënjësore në sistemin shtetëror. Ai theksoi se shqiptarët që jetojnë jashtë vendit janë të gatshëm të kontribuojnë për ndryshimin e kërkuar.
Sipas protestuesit, shteti duhet të funksionojë në shërbim të sovranit dhe jo të interesave të oligarkëve. "Ky popull ka vuajtur dhe ka nevojë për një shtet të ri që t’i shërbejë sovranit dhe jo këtyre oligarkëve", deklaroi ai.
Duke evokuar përvojën e tij si pjesëmarrës në lëvizjen studentore të vitit 1990, ai nënvizoi se brezi i asaj kohe synonte ndërtimin e një Shqipërie europiane. Megjithatë, ai vlerësoi se objektivat e asaj periudhe nuk u përmbushën për shkak të ndërhyrjeve të agjenturave të shtetit. Në fund, ai u bëri thirrje të pranishmëve që të mos humbin besimin dhe të vazhdojnë angazhimin aktiv për ndryshime sociale.