Çështja e Enid Kasmit, një shtetas shqiptaro-kolumbian, ka ngritur pikëpyetje të shumta pas zhdukjes së tij nga mbikëqyrja e autoriteteve venezueliane. Kasmi u arrestua nga shërbimi i inteligjencës DGCIM më 19 maj 2025, ndërsa ndaj tij rëndonte një kërkesë për ekstradim nga Mbretëria e Belgjikës.
Dokumentet e siguruara nga media El Tiempo dhe të shqyrtuara nga Gjykata e Lartë e Venezuelës zbulojnë se Kasmi ishte dënuar më 29 tetor 2024 në Bruksel me 12 vite burg dhe një gjobë prej 560 mijë eurosh. Dënimi erdhi si rezultat i një hetimi ndërkombëtar të bazuar në platformën e koduar EncroChat, ku Kasmi u identifikua si organizator i dërgesave të kokainës nga Amerika Latine drejt Belgjikës. Organizata kriminale në të cilën ai dyshohet se bënte pjesë posedonte pasuri që kalonin vlerën e 200 milionë eurove.
Përveç procedurave të ekstradimit të kërkuara nga pala belge më 23 korrik 2025, autoritetet venezueliane kishin hapur ndaj tij edhe një hetim të brendshëm për vepra të rënda penale, duke përfshirë terrorizmin, financimin e terrorizmit, komplotin dhe pjesëmarrjen në organizatë kriminale. Situata ndryshoi kur Gjykata e Lartë deklaroi paaftësinë për të lokalizuar të ndaluarin. Në mungesë të përgjigjeve nga gjykata e qarkut të Karakasit lidhur me statusin e tij, gjykata vendosi më 20 mars 2026 arkivimin e përkohshëm të kërkesës për ekstradim, duke urdhëruar Prokurorinë Publike për kërkimin dhe lokalizimin e tij të mëtejshëm.