Enver Hoxhaj, deputet i Partisë Demokratike të Kosovës dhe ish-ministër i jashtëm, ka reaguar në një postim në Facebook për situatën politike në Kosovë. Ai paralajmëron për një krizë të thellë institucionale dhe rrezik destabilizimi të rendit politik.
Hoxhaj shkruan se Kosova po shndërrohet nga një vend me më pak rend në një vend pa rend fare, duke rrezikuar të kaplohet nga kaosi dhe anarkia. Ai përmend se viti i kaluar u mbyll pa një Kuvend me funksion të plotë dhe pa një Qeveri me mandat demokratik. Pas dy javësh, sipas tij, rrezikohet të mbetet edhe pa një President legjitim.
Ai thekson se periudha kur institucionet ndërtoheshin shpejt pas zgjedhjeve i përket së kaluarës. Në një moment kur bota përballet me sfida të mëdha që përcaktojnë fatin e kombeve, Qeveria e Kosovës po luan me shtetin dhe po sakrifikon interesin kombëtar për ego të vogla politike dhe ambicie personale.
Sipas Hoxhajt, kjo nuk është më thjesht krizë politike, por një rrëshqitje e rrezikshme që dobëson Kosovën nga brenda dhe jashtë. Ai paralajmëron se nëse kjo rrugë vazhdon, Kosova rrezikon të mbetet jashtë skenës ndërkombëtare, të humbasë vëmendjen e aleatëve dhe mundësitë strategjike për zhvillim e integrim. Një shtet nuk mund të mbijetojë pa institucione funksionale, pa rend politik dhe pa besim tek aleatët.