Presidenti i Turqisë, Recep Tayyip Erdoğan, deklaroi pas mbledhjes së kabinetit qeveritar se vendi i tij ndodhet në gjendje alarmi për shkak të përshkallëzimit të tensioneve në Lindjen e Mesme. Ai bëri të ditur se institucionet shtetërore janë në gatishmëri të plotë që nga 28 shkurti dhe po ndjekin zhvillimet minutë pas minute.
Erdoğan iu referua një incidenti me një raketë balistike iraniane të lëshuar drejt Turqisë, e cila u interceptua nga NATO. Ai e cilësoi këtë veprim si “jashtëzakonisht të gabuar dhe provokues” nga ana e Iranit. Sipas një burimi, bëhet fjalë për raketën e dytë të tillë, ndërsa tensionet lidhen me konfliktin SHBA-Izrael–Iran.
Turqia ka forcuar praninë ushtarake në pjesën veriore të Qipros, të kontrolluar nga turqit, duke dislokuar gjashtë avionë luftarakë F-16 Fighting Falcon dhe sisteme të mbrojtjes ajrore. Këto masa synojnë rritjen e sigurisë në zonë.
Presidenti turk theksoi se prioriteti kryesor është mbrojtja e Turqisë dhe e 86 milionë qytetarëve të saj. “Qëllimi ynë është ta mbajmë vendin tonë larg këtij konflikti. Nuk duam që as edhe një fije floku e qytetarëve tanë të dëmtohet”, u shpreh ai.
Ndërkohë, Ankaraja po kryen kontakte diplomatike me aleatët dhe partnerët ndërkombëtarë për të parandaluar përhapjen e krizës. Erdoğan deklaroi se, ndërsa disa aktorë po “hedhin benzinë në zjarr” dhe përpiqen ta destabilizojnë rajonin, Turqia po përpiqet të shuajë flakët dhe të luajë rol stabilizues. Ai përsëriti se Turqia do të vazhdojë të ndjekë zhvillimet në koordinim me NATO dhe do të marrë masat e nevojshme për sigurinë e saj.